ភ្នំពេញ៖ សាច់ ស៊ុត ត្រីទឹកសាបនិងទឹកប្រៃទាំងស្រស់និងកែច្នៃទាំងអស់ ជាមួយនឹងគ្រឿងទេសដែលមានដូចជាស្ករ អំបិល ទឹកត្រី ទឹកស៊ីអ៊ីវ គ្រប់ប្រភេទនឹងត្រូវរដ្ឋជួយចេញថ្លៃអាករលើតម្លៃបន្ថែម (VAT) រហូតដល់ចុងឆ្នាំ២០២៣ ដោយថាដើម្បីជួយសម្រួលជីវភាពរស់នៅប្រចាំថ្ងៃរបស់ប្រជាពលរដ្ឋ។

ក្នុងប្រកាសស្ដីពីការចាត់ជាបន្ទុករដ្ឋនូវអាករលើតម្លៃបន្ថែមលើមុខទំនិញដែលជាអាហារជាមូលដ្ឋានសម្រាប់ការរស់នៅប្រចាំថ្ងៃរបស់ប្រជាពលរដ្ឋ រដ្ឋមន្ត្រីក្រសួងសេដ្ឋកិច្ចលោកឧបនាយករដ្ឋមន្ត្រី អូន ព័ន្ធមុនីរ័ត្ន បានកំណត់ថា អាហារជាមូលដ្ឋាន ដែលសំដៅសាច់សត្វ និងគ្រឿងទេសទាំងអស់នេះនឹងត្រូវចាត់ជាបន្ទុករដ្ឋនូវអាករលើតម្លៃបន្ថែមសម្រាប់រយៈពេល២ឆ្នាំគិតចាប់ពីថ្ងៃទី១ ខែមករា ឆ្នាំ២០២២ រហូតដល់ថ្ងៃទី៣១ ខែធ្នូ ឆ្នាំ២០២៣។

រដ្ឋមន្ត្រីក្រសួងសេដ្ឋកិច្ចក៏បានលើកឡើងផងដែរថា ការចេញថ្លៃអាករនេះគឺមិនរាប់បញ្ជូលការផ្គត់ផ្គង់អាហារដោយភោជនីយដ្ឋាននោះទេ។

អាករលើតម្លៃបន្ថែម (VAT) គឺជាប្រភេទពន្ធប្រយោល ដែលរដ្ធដកហូតប្រយោលពីអ្នកប្រើប្រាស់ តាមរយៈអ្នកផ្គតផ្គង់ក្នុងបុគ្គលជាប់អាករ។ អត្រា0%សម្រាប់ការនាំចេញ ឬផ្គត់ផ្គង់ក្រៅកម្ពុជា និងអត្រា១០%សម្រាប់ការផ្តត់ផ្គង់ក្នុងស្រុក៕